Словакия бапкері Қазақстанмен матч алдында командасының ойынын сынады

Словакия өз алаңында Молдова қақпасына екі гол соғып, турнирді жеңіспен бастады. Алайда Вайсс шәкірттерінің алғашқы жиырма минуттағы әрекетіне көңілі толмағанын жасырмады.

«Жеңіске жеткенімізге қуаныштымын. Біз айқын фаворит мәртебесін ақтап, 2:0 есебімен жеңдік. Есеп бұдан да ірі болуы мүмкін еді. Бірақ ойынды өте нашар бастадық. Алғашқы жиырма минут біз үшін өте әлсіз өтті. Қарсыласқа шабуылға шығуға мүмкіндік бердік, бұл дұрыс болмады.» — деді Вайсс.

Словакиялық маманның айтуынша, алғашқы голдан кейін командасы өзіне келіп, алаңдағы жағдайды бақылауға алған. Сонымен қатар ол ойыншылардың жеке өнерінде айырмашылық болғанын атап өтті.

«Голдан кейін сабырға келдік. Жекелеген футболшылар өте жақсы ойнады, бірақ әлсіз өнер көрсеткендер де болды. Мұны құрамнан да байқауға болады. Ұлттық құрамада ойнау кез келген футболшыға оңай емес. Кейде толқу, жауапкершілік пен міндет сезімі әсер етеді.» — деді Словакия құрамасының бас бапкері.

Дегенмен Вайсс жалпы нәтиже мен ойыншылардың матчқа деген қарым-қатынасына көңілі толатынын айтты.

«Жалпы, ойынға деген көзқарасқа ризамын. Үш ұпай алдық. Біз жеңуге міндетті едік. Енді әрі қарай қозғалуымыз керек.» — деді маман.

Словакия құрамасын енді Қазақстанға қарсы матч күтіп тұр. Екі команда арасындағы Ұлттар лигасының екінші тур ойыны 29 қыркүйекте Кошицеде өтеді. Кездесу Қазақстан уақытымен 30 қыркүйекке қараған түні ұйымдастырылады.

Қазақстан алғашқы турда Фарер аралдарымен сырт алаңда 1:1 есебімен тең түсті. Ал Словакия Молдованы 2:0 есебімен жеңіп, үш ұпай еншіледі. Сондықтан Кошицедегі кездесу C3 тобындағы турнирлік жағдайға тікелей әсер ететін маңызды ойындардың бірі болмақ.