Әлемдік дода «корольсіз» өтеді

І. Еуропа

Швеция – Португалия – 2:3  (Ибрагимович, 68, 72 – Криштиану Роналду, 50, 77, 79) Бірінші матч – 0:1 Еуропа құрлығында қосымша іріктеуге шыққан 4 жұптың ішіндегі ең қызықтысы – осы Швеция мен Португалия еді. Екеуінің сапында да футболды айрықша өнер дә­режесіне көтерген «сиқыршылар» бар. Шынында да, сол екі «сиқыршының» бірі – Златан Ибрагимович пен Криштиану Ро­­нал­дудың бірі – бармай қалатын болса, әлемдік дода жетімсіреп қалатыны да шын еді. Қазақстанмен бір топта ойнап, Астана төрінде алғашқы минутта-ақ гол соққан Ибрагимовичтің Швециясы да, Ресеймен бір топта ойнап, екінші орынды қанағат еткен Роналдудың Португалиясы да фина­листер сапынан табылуға лайық болатын. Дегенмен футбол қаншалықты командалық ойын болса да, матч тағдырын тұлғалар шешетінін осы екі саңлақ дәлелдеп берді. Өзіне өте сенімді Златан да қарымта матч алдында отқа май құя түскен. «Бұл кездесулердің қорытындысында кім же­ңімпаз атанады?» деген тілші сұрағына ол: «Оның жауабын Құдай ғана біледі», – деп жауап берді. «Құдайға бұл сұрақты қою қиын ғой» деп үстемелей түскен тілшіні: «Сен Құдаймен дәл қазір сөйлесіп отыр­сың», – деп дағдартты. Әрине, Златандікі асылық-ақ. Қарымта кездесуде ол барын салды, қос доп енгізді, бірақ Криштиану Роналду бәрібір өзінің әлемдегі ең үздік футболшының бірі ғана емес, бірегейі екенін дәлелдеді. Тіпті 77-минутта Роналду есепті теңестіргенде, Ибрагимович қол да соқты. Әрине, Ибрагимовичтің «дублінен» Роналдудың «хет-тригі» әлдеқайда салмақ­ты. Өйткені, әуелгі матчтың 82-минутында дәл сол Криштиану Роналду жеңіс голын соққан болатын. Ендеше, португалиялық «сиқыршының» 4 голына Златан кемі 5 голмен жауап беруге тиіс еді. Матч аяқталған соң да Ибрагимович тыншыған жоқ. «Бұл менің әлем чемпионатына қатысуға соңғы мүмкіндігім еді. Енді бір ғана нәрсеге өкінуге болады – 2014 жыл­ғы әлем чемпионатында менсіз ешқандай да қызық жоқ» деп мәлімдеді. Ал мұндай үлкен мәлімдемелер жасамай-ақ үлкен істер тындырып жүрген Криштиану Роналду Португалия құрамасы тарихын­дағы ең мерген шабуылшылар санатына қосылды. Швеция қақпасына соққан 4 доп арқылы ол ұлттық құрама сапындағы голдар санын 47-ге жеткізді. Бұрын мұндай көрсеткіш тек Педру Паулетаға ғана тиесілі болатын.       Франция – Украина – 3:0  (Сахо, 22, Бензема, 34, Гусев, 72-өз қақпасына) Бірінші матч – 0:2 Франция құрдым алдында тұрып, жан сақтап қалды. Бірінші матчта 0:2 есебімен ұтылған соң, Дидье Дешам шәкірттеріне шегінер жер қалмаған болатын. Қарымта матчта ірі есеппен ұтылғанына қарамастан, Украина құрамасының жерге қарайтын жөні жоқ. Матч алдында Украина құра­масының бас бапкері М.Фоменко төре­шілердің қысымынан іш жиятынын, қалай дегенде де матчтың УЕФА президенті М.Платинидің Отанында өтетінінің өзі үлкен психологиялық жүк екенін айтқан-ды. Бапкер әулие екен. Словениялық қазы Д.Скомина мен оның көмекшілері екінші голды Кәрім Бензема таза офсайттан соқ­қанын байқаған жоқ. Украина құрамасы тағы да қосымша ойындардың құрбаны болды. Бұған дейін бұл құрама 1998 (хорваттардан – 0:2, 0:0), 2002 (немістерден – 1:1, 1:4), 2010 (гректерден – 0:0, 0:1) жылдардағы әлем бі­ріншілігінің қосымша іріктеуінен өте ал­маған болатын. Хорватия – Исландия – 2:0  (Манджукич, 27, Срна, 47) Бірінші матч – 0:0 Румыния – Грекия – 1:1  (Торосидис, 55-өз қақпасына – Митроглу, 23) Бірінші матч – 1:3 Еуропа құрлығынан әлем чемпиона­тының финалдық кезеңіне Бельгия, Хорватия, Италия, Германия, Голландия, Швейцария, Ресей, Португалия, Босния және Герцеговина, Грекия, Англия, Испания, Франция құрамалары шықты. Кәрі құр­лықтан әлемдік додаға өз тарихында тұң­ғыш рет қатысатын құрама – Босния және Герцеговина.

ІІ. Африка

Қосымша іріктеу ойындары Кот д’Ивуар – Сенегал – 3:1, 1:1 Нигерия – Эфиопия – 2:1, 2:0 Камерун – Тунис – 0:0, 4:1 Гана – Египет – 6:1, 1:2,  Алжир – Буркино-Фасо – 2:3, 1:0 Африкадан әлем біріншілігіне Кот д’Ивуар, Нигерия, Камерун, Гана, Алжир құрамалары шықты.

ІІІ. Азия және Оңтүстік Америка

Сары құрлықтан әлем чемпионатына тікелей жолдаманы Иран, Австралия, Оңтүстік Корея, Жапония құрамалары жеңіп алды. Қосымша іріктеу кезеңіне Йордания құрамасы шықты. Оңтүстік Америкадан Бразилия (жарысты ұйымдастырушы ел), Аргентина, Колумбия, Чили, Эквадор құрамалары тікелей жолдама жеңіп алды. Қосымша іріктеу кезеңіне Уругвай құрамасы шы­ғып, Азияның бесінші құрамасымен (Йорданиямен) кездесуге мүмкіндік алды. Бірінші кездесу Амман қаласында қонақ­тардың күмәнсіз басымдығымен аяқталды – 0:5. Қарымта матч кеше түнде ойналды. Уругвайдың әлем чемпионатына ең соңғы болып тіркелетіні күмән тудырмайды.

IV. Мұхиттар аймағы және КОНКАКАФ

Мұхиттар аймағынан Жаңа Зеландия дара шықты. КОНКАКАФ-тан тікелей жолдамаға АҚШ, Гондурас, Коста-Рика құрамалары ие болды. Қосымша іріктеу матчтарында Мексика құрамасы Жаңа Зеландияны 5:1 және 4:2 есептерімен ұтып, әлем чемпионатына жолдама алды. Сонымен, Бразилия алаңдарында өнер көрсететін 32 құрама да белгілі болды. Бұл құрамалар жеребе барысында 4 қоржынға бөлінеді. Алғашқы қоржынға ұйымдастырушы Бразилиямен бірге ФИФА-ның биылғы қазан айындағы рей­тингі бойынша үздік 6 команда бірік­тіріледі. Басқа қоржындарға кұрамалар жағрафиялық орналасуы бойынша бөлінуі мүмкін. ФИФА бөлу шартын әлі жариялаған жоқ. Әлем чемпионатының жеребесі 6 желтоқсан күні Бразилияның Мата-ди-Сан-Жуан қаласында тартылады. Қазан айының рейтингі бойынша алғашқы себетке Бразилия, Испания, Германия, Аргентина, Колумбия, Бельгия, Уругвай, Швейцария құрамаларының түсетіні күмән тудырмайды.

Автор: Есей ЖЕҢІСҰЛЫ

http://dmk.kz/kz/news/view/36047