«Атырауда» қаржылық заңбұзушылық? Легионерлердің айлығы келісімшарт бойынша 200 мың, ал іс жүзінде одан әлдеқайда көп алып отырған

Дәлірек айтсақ, «мұнайшылар» жейдесінде доп тебетін легионерлердің жалақы мөлшерін дұрыс көрсетпеу фактісі тіркелген көрінеді. Бұл туралы GOAL.KZ телеграм-арнасы «Ақжайыққа» сілтеме жасай отырып мәлімдеді.

Аудиторлық тексеріс барысында «Атырауда» келісімшарттағы шетелдік футболшылардың жалақысы 3 миллион көлемінде болғаны анықталған. Алайда, қағаз жүзінде бұл сома 200 мың теңге деп көрсетілген екен. Енді қазір бұл жағдайдың жай-жапсары анықталуда.

«Жалақы мәселесіне ерекше көңіл бөлінді. Мемлекеттік бюджеттен легионерлерді қаржыландыруға тыйым салынса да, клуб жыл басында 8 легионермен  келісімге келген. Келісмшартта олардың айлығы 200 мың деп көрсетілсе, іс жүзіндегі жалақы мөлшері 3 миллионнан асып түсіп отырған», - делінген телеграм-арнасының жазбасында.

«Атырау» ҚПЛ-дің тоғыз турынан кейін 4 ұпаймен он үшінші орында келеді. Келесі турда «мұнайшылар» «Қайсарды» қабылдайды. Бұл ойын 25-мамырға жоспарланған.