Бешікташтың әйел жанкүйері Трабзонспор жаттықтырушысына бәтіңке лақтырды

Бәтіңкені тек жорналшылар емес, фотомодельдер де лақтыра алады. Тек Бушқа емес... Шенол Гүнешке. Өткен аптаның жексенбісінде Бешікташтың стадионында ойналған Бешікташ-Трабзонспор матчында Менекще Гүнгор атты фотомодельдің лақтырған аяқкиімі Шенол Гүнешті «адаспай тапты». Трабзонспорлық жанкүйерлердің 88-минутта соғылған Бурак Йылмаздың голынан кейін қатты қуанғанына шыдамаған Бешікташ жанкүйері Менекще Гүнгор аяқкиімін лақтырып кеп жібереді. Қызық қылғанда онысы төреші шешімімен трибунадан орын алған басқа емес, Трабзонспор жаттықтырушысы Шенол Гүнешке барып тиеді. Аяқкиімді лақтырған өзі екенін мойындаған модель оны әдейілеп Шенол Гүнешке бағыттамағанын айтып ант су ішті. Түркияның әлем чемпионатында үшінші орын алуына еңбегі өлшеусіз сіңген, түрік футболындағы қадірлі есім Шенол Гүнешке деген құрметінің өлшеусіз екенін, сондықтан ол кісіге аяқкиім лақтыру дегенің таза ақымақтық болатынын, алайда екінші голға қатты қуанған жанкүйердің айқайынан соң өз-өзіне есеп бере алмай қалғанын, сосын осындай әрекетке барғанын жайып салды.

Дерби деп атауға болатын аталмыш матчта протокол трибунасының да 70%-ы Трабзонспордан құралыпты. «Өз үйімізде қонақ сияқты болдық»,-деп шағымданады Бешікташ жанкүйерлері. Бүгін қауіпсіздік қызметкерінің алдында 1 сағаттан артық уақыт өткізген Менекще Гүнгор шыққан соң баспасөз өкілдерінің сауалдарына жауап беруден бас тартты. Тек, жіберген аяқкиімінің «әдірісті» дұрыс таппағанын, алайда әрекеті үшін өкінбейтінін айтады.

Ғалия Серікқызы, Түркиядан.