Грозныйлық «Ахмат» басшылығы Қазақстандық футболшы Ғалымжан Кенжебектің командадан кетуін немесе жалдауға берілуін мүлдем қарастырмайды, деп хабарлайды Aladop.kz.
Бұл туралы ойыншының агенті Ломидзе Vesti.kz порталына берген сұхбатында мәлімдеді.
Агенттің айтуынша, Кенжебек «Ахмат» сапында болған уақыт ішінде ойыншы ретінде айтарлықтай өсіп, өз шеберлігін шыңдаған. Команда ішіндегі бәсекелестікке қарамастан, Ғалымжан кубоктық матчтарда тұрақты түрде өнер көрсетіп, жақсы ойын үлгісін байқатып жүр. Бапкерлер штабы оған үлкен сенім артады және оның Ресей Премьер лигасы аясында да өзін көрсетуге мүмкіндігі бар деп есептейді.
Қазіргі таңда Кенжебекке деген қызығушылық жоғары. Қазақстанның көптеген клубтары оны өз қатарынан көргісі келеді. РПЛ-дің бірқатар командалары тарапынан да қызығушылық бар.
Алайда, «Ахмат» басшылығы футболшыны жіберу туралы мәселені тіпті талқылағысы келмейді. Олар ойыншының әлеуетіне сенетіндіктен, оны команданың негізгі құрамында қалдыруды жөн көріп отыр.
