“Ақтөбе” клубының 17 жастағы жұлдызы, шабуылшы Виталий Латурнус Еуропалық алпауыт — Португалиялық “Порту” клубының академиясына ауысуға өте жақын болған, деп хабарлайды Aladop.kz.
ASnews.kz сайтының мәліметіне сүйенсек, қазақ футболының болашағы саналатын жас талант Еуропа скауттарының назарына ілігіп, үлкен трансферлік интриганың ортасында қалған.
Оқиға осы маусымның алдында қатты өршіген. Ол кезде “Ақтөбе” клубының экс-скауты болып қызмет атқарған Португалиялық белгілі маман Шаинью Қазақстан жасөспірімдер құрамасының шабуылшысы Виталий Латурнустың алаңдағы ойыны мен техникасына тәнті болған. Оның болашағынан зор үміт күткен маман шұғыл түрде Португалиядағы танымал “Порту” клубының жоғары шенді өкілдерімен тікелей байланысқа шығып, Виталийдің кандидатурасын ресми түрде ұсынған:
“Шаинью Виталийдің дәл өзі сияқты әлемдік деңгейдегі жас таланттардың ортасында өсіп, тәрбиеленгені маңызды деп санады. Оның ойынша, Қазақстандық шабуылшының толық ашылуы үшін Еуропалық стандарттағы сапалы алаңдар, ең заманауи жаттығу алаңдары мен арнайы дұрыс тамақтану жүйесі қажет болды.” — деп мәлімдеді клубтың ішкі жағдайына жақын сенімді дереккөз.
Еуропалық алыптың қызығушылығына қарамастан, “Ақтөбе” клубының басшылығы өз академиясының басты гауһарын оңай жібере салмауды жөн көрді. Батыстық ұжым Виталий Латурнусты команданың болашақ негізгі құрамының өзегі ретінде көріп, оны өз сапында алып қалу туралы батыл шешім қабылдаған екен.
Клуб басшылығы жас дарынды тек Еуропаға жіберуден ғана емес, сонымен қатар Бірінші лига командаларынан түскен көптеген жалға алу туралы тиімді ұсыныстардан да түбегейлі бас тартқан көрінеді.
