Әли Әлиев Рамазан Оразов туралы: не клуб ауыстыруы керек, не болмаса қазіргі командасында негізгі құрамға оралуы қажет

«Мен Рамазанмен сөйлестім, өзім хабарластым. Кеңейтілген тізімге енген, бірақ соңғы құрамға кірмеген әрбір ойыншымен тілдестім. Рамазанның өзі де ойын тәжірибесінің аздығынан ұлттық құрамаға шақырту алмағанын жақсы түсінеді. Ол өзі де бұл шешімнің дұрыс болуы мүмкін екенін мойындады. Қазір ол үшін маңызды шешім қабылдайтын кезең келді – тұрақты түрде ойнау үшін не клуб ауыстыруы керек, не болмаса қазіргі командасында негізгі құрамға оралуы қажет. Бізге дәл осындай тәжірибелі футболшылар қажет», – деді бас бапкер.

Дания Суперлигасының 24/25-жылғы маусымында Рамазан Оразов «Силькеборг» сапында 23 ойынға қатысып, 3 голдың авторы атанды. Десе де отандасымыздың біраз уақыттан бері алаңға шықпай, негізгі құрамдағы орнын жоғалтып алғанын қоса кетуіміз керек.