«Манчестер Юнайтедтің» бұрынғы жартылай қорғаушысы Поль Погба «Ювентусқа» ауысады, деп хабарлайды инсайдер Фабрицио Романо.
Дереккөздің айтуынша, қос тарап келісім-шарт талаптары жайлы нақты мәмілеге келген. Ресми ақпарат шілде айының басында жарияланады. Ал Погбаның өзі Италияға екі аптадан кейін келеді.
Француз футболшысы медициналық тексерістен 5-8 шілде аралығында өтеді деп күтілуде. Айта кетейік, 29 жастағы Погба туриндік клуб сапында 2012-2016 жылдар аралығында өнер көрсеткен. «Ювентус» оны сол кезде «Манчестер Юнайтедке» 105 миллион еуроға сатып жіберген еді.
Еске салайық, Поль Погба «Манчестер Юнайтедпен» келісім-шарт мерзімінің аяқталуына байланысты кеткен болатын. Ол өткен маусымда 27 ойынға қатысып, 1 гол соқты, 9 нәтижелі пас берді.
