«Қайрат» командасының бас бапкері Құрбан Бердыев Қазақстан кубогінің финалында «Шахтерге» қарсы өтетін матч жайлы пікір білдірді.
- Сіздерге қарсы қыркүйек айында ойнаған «Шахтердің» қазіргіден айырмашылығы қандай?
- Менің ойымша, «Шахтер» кубокте керемет ойнайтын команда. Олар әр эпизод үшін күреседі және қорғаныс шебін дұрыс құра алатын білікті бапкері бар. Ертең қиын кездесу күтіп тұр.
- Жартылай финалда «Астана» мұншалықты әлсіз ойнайды деп күткен жоқсыз ба?
- «Астананың» негізгі ойыншылары болмады. Әрине, бұл нәтижеге әсер етті. Бірақ, Нұр-Сұлтанда өткен бірінші жартылай финалдық кездесуде «Астананың» гол соғатын бірнеше мүмкіндігі болды. Егер олар мұны пайдаланғанда, әрі қарай не болары белгісіз еді.
- «Базельге» қарсы матчта сіз 5-2-3 схемасымен ойнадыңыз және үш орталық шабуылшыны шығардыңыз. Чемпионат ойындарына қарағанда схеманы сәл өзгерткіңіз келді ме?
- Әңгіме алдыңғы немесе артқы жақта ойнайтын ойыншыларда емес. Чемпионаттағы 5-3-2 схемасы туралы айтатын болсақ, бұл жерде Косович алға жылжитын еді, сондықтан 5-2-3 схемасында ешқандай өзгеріс бола қойған жоқ. Мәселе ойыншылардың осы жүйе аясында өзара әрекеттесуінде. Қайталап айтамын, «Шахтер» – сауатты команда. Бұл қызықты ойын болғалы тұр.
- Пенальти сериясына дайындалып жатырсыз ба?
- Жоқ, дайындалып жатқан жоқпыз. Егер ойыншылар дайындық кезінде соққыларын сәтсіз орындаса, бұл оларға психологиялық тұрғыдан әсер етуі мүмкін.
- «Шахтердің» «Астана-Аренада» жаттығып жүргеніне екі аптадан асты, ал сіздер енді ғана келдіңіздер. Бұл қарағандылықтар үшін артықшылық бола ма?
- Бұл артықшылық болады деп ойламаймын. «Карабахпен» болған матчтан кейін «Астанамен» ойнаған кезде де дәл осындай жағдайға тап болдық.
- Турнирдің топтық кезеңінде «Қайрат» көптеген жас ойыншыларға мүмкіндік берді. Шешуші кезеңдерде олардың саны азайды. Болашақта оларда өзін көрсетуге мүмкіндік бола ма?
- Мен клубтың қандай стратегия ұстанатынын білмеймін. Көп нәрсе стратегиялық бағытқа байланысты.
