Жоао Пауло: «Мен Қазақстан ұлттық құрамасының бас бапкерімен әңгімелестім»

28.04.2021 18:01 ҚПЛ

Пауло 57 матчта 33 гол соғып, «Ордабасы» тарихындағы ең үздік сұрмерген атанды

Жоао Пауло: «Мен Қазақстан ұлттық құрамасының бас бапкерімен әңгімелестім»

«Ордабасының» бразилиялық шабуылшысы Жоао Пауло 2019 жылы Премьер-лиганың қола жүлдегері атанды, ал өткен маусымда үздік сұрмерген және маусымның үздік ойыншысы деген марапаттарды қанжығасына байлады. Ағымдағы маусымда «Ордабасы» тарихындағы ең үздік сұрмергендердің көшін бастады. Сұхбат барысында Жоао Пауло азаматтығын ауыстыру мүмкіндігі, маусымға арналған мақсаттар мен осы маусымның үздік сұрмергені атануға үміткер ойыншылар жайлы айтып өтті.

- Өткен турда «Қайсар» сіздерге айтарлықтай қауіп төндірді, алғашқы таймда командаға не болды?

– Бірінші таймда алғаш болып гол соқтық, алайда бірден екі гол жіберіп алдық. Меніңше, бізге жинақылық жетіспеді, бірақ үзіліс кезінде түзетулер енгізіп, екінші таймда ойын барысын өз пайдамызға асырдық.

- Үш маусым ішінде сіз «Ордабасы» тарихындағы үздік сұрмерген атандыңыз. Қандай эмоцияларды бастан кешірудесіз?

– «Ордабасы» секілді алпауыт клубтың тарихына енгенімнен тек қуанышты әсер алудамын, өзімді өте бақыттымын деп санаймын.

- Сіздің голдарды алма-кезек соғатыныңыз Премьер-лига деңгейінің орташа екенін білдіре ме әлде төмен бе?

– Менің ойымша, голдар сіз айтып отырғандай оңайлықпен соғылмайды, бірақ мен командама осы үшін алғыс айтамын, себебі оларсыз мен гол соға алмас едім. Олар маған допты жеткізіп беріп, ойынды жеңілдетеді, ал мен өз кезегімде мүмкіндікті қолдану үшін бар күшімді саламын.

- Өзге де мықты чемпионаттарға кету жайлы ойыңыз болды ма? Егер мүмкіндік болса, қай елге барар едіңіз?

– Маған ешқандай ұсыныстар келіп түскен жоқ, оның үстіне менің «Ордабасымен» келісім-шартым бар және тек осы клубтағы жұмысым жайлы ойлаймын. Егер ұсыныс түссе, біз отырып ойланатын боламыз. Бірақ қайталап айтамын, мен толықтай «Ордабасы» жайлы ғана ойлаймын.

- Сіздің азаматтығыңыздың ауысуы жайлы алып-қашпа әңгімелер көптеп айтылуда. Сізге немесе агенттеріңізге осы мәселе бойынша біреу байланысқа шықты ма?

– Барлығы БАҚ-тан басталған еді, кейіннен біз Қазақстан ұлттық құрамасының бас бапкерімен (Талғат Байсуфиновпен) әңгімелестік. Бұл әңгіме мен Нұр-Сұлтандағы футбол федерациясынан өткен маусымның жүлделерін алып жатқан кезде болды. Әңгіме барысында маған Қазақстан құрамасы үшін ойнауға қалай қарайтыным жайлы сұрақ қойылды. Мен мұның үлкен мәртебе екенін және ұлттық құраманың жейдесін мақтанышпен киетінімді айттым.

- Сіздің Наталдан шыққан жерлесіңіз Дуглас Жуниор қазірдің өзінде Қазақстан құрамасында доп тебеді, алайда футзалда. Ал сіз азаматтығыңызды ауыстырып, Қазақстан үшін ойнауға дайынсыз ба?

– Иә-иә, мен тіпті Дугласпен осы мәселе жөнінде сөйлескенмін. Біз онымен бұрыннан таныспыз және екеуімізде Натал қаласынанбыз. Ол сонымен қатар, маған азаматтығының ауыстырылу процессі жайлы айтып, менің мансабым үшін бұл өте жақсы болатынын айтты. Бұл ұсыныстың түскеніне өте қуаныштымын және барлығы ойдағыдай болады деп сенемін.

- Сіздің қалаңыздың тумалары, мүмкін достарыңыз мықты чемпионаттарда өз бағын сынап көріп пе еді?

– Менің қаламда егде жастағы ойыншылар бар болатын, мысалы Бразилия ұлттық құрамасы сапында және 1974-жылғы Әлем Чемпионатында, АҚШ пен Германияның клубтарында доп тепкен Мариньо Шагас. Сонымен қатар азаматтығын ауыстырып, Мексика үшін ойнаған Зинья атты ойыншы да бар.

- «Ордабасы» өткен маусымда тек бесінші орынға тұрақтады. Екінші жыл қатарынан жүлдесіз қалу трагедия болатын шығар?

– Иә, бұл өте қиын шақ болды. Алайда біз қазір жүлдегерлер қатарына енуді көздеудеміз. Маусым қорытындысы бойынша үздік үштіктен орын алу үшін бар күшімізді саламыз. Біздің барша талпыныстарымыз өз мақсатымызға жетуге көмектеседі деп үміттенемін.

- Өткен турдан кейін сіз қайтадан сұрмергендер кестесінде көш бастадыңыз. Премьер-лига ойыншыларының қайсысы маусым қорытындысы бойынша үздік сұрмерген атана алады?

– Сұрмергендер тізіміндегі бәсекелестік өте жақсы. Өзіңіз көргендей деңгей өте жоғары және біршама ойыншылар бұл жүлдеге таласа алады. Абат Айымбетов, Марин Томасов және Вагнер Лавты басты үміткерлер деп санаймын. Мен де бұл атаққа соңына дейін таласып, Құдайдың қолдауымен тағы да маусымның үздік сұрмергені атанамын деген сенімдемін.

0 пікір