Ұлттық құрама футболдан Еуропа біріншілігіне іріктеу шеңберінде Латвиямен кездесу өткізді. Ұлттық арнадағы «Айтуға оңай» бағдарламасы жарады. Бір хабарын түгел осы матчқа арнап, Астана мен Алматы арасында арнайы телекөпір ұйымдастырды. Қазақстан Футбол федерацияның өкілдері жағдай оңалады деп сендіруге тырысты.
Әрине, ұлттық құрама өз тобында озып шығып, чемпионатқа қатысады деп уәде берген жоқ. Бермегені дұрыс. Өйткені, Голландия, Чехия және Түркиямен үзеңгі қағыстыру – көтере алмас шоқпарды белге байлаумен бірдей. Әйтсе де, федерация бір кездері 2016 жылы кәрі құрлықтың біріншілігінде ойнаймыз деген сипатта мәлімдеме жасаған. Қазір оны еске алып жатқан ешкім жоқ... Латыштармен кездесу қарсаңында елеулі ауыс-түйіс болды. Саян Хамитжанов басқа жұмысқа ауысты. Ұзақ уақыт бойы отандық футболдың бағыт-бағдарын белгілеп келген Михаил Гурман қызметінен кетті. Сол кісінің тұсында Пайперс, Шторк, Беранек секілді тәжірибесіз шетелдік бапкерлер ұлттық құраманы төрден босағаға сүйреді. ФИФА рейтингісінде Ауғанстан, Үндістан секілді елдермен көршіміз. Ресей чемпионатының екінші лигасында ойнайтын ортанқол футболшылар еліміздің азаматтығын алып, құрамаға қабылданып жатты. Қосазаматтық алуға тыйым салатын заңды белден басқандар да бар арасында. Есесіне, Беранектің басынғаны сонша, ең тәжірибелі Самат Сымақовты ұлттық құрамаға қоспай қойды. Ал М.Гурманның ұлы Марк өз қақпасына гол соқса да, негізгі құрамда ойнап жүрді. Қысқасы, бұған дейінгі еліміздің футболы шетелдіктердің көсегесін көгертіп, отандық жанкүйерді қуанта алмады. Қазақстан-Латвия кездесуін тамашалап, ішіміз жылып қалды. Бауыржан Исламхан, Самат Сымақов, Қайрат Нұрдәулетов әдемі ойын көрсетіп, шетелдік бапкерлердің «қазақ жігіттері футбол ойнай алмайды» деген теріс түсінігін жоққа шығарды. Бас бапкер Ю.Красножан командаға ойын барысында тактикалық (3-4-3 немесе 5-4-1) амалды өзгерте білуді үйретіпті. Бұл да жақсылықтың нышаны. 2016 жылғы чемпионатқа бармаспыз. Бірақ болашақтан үмітіміз бар.
