Ресей Премьер лигасында өнер көрсетіп жүрген Қазақстан ұлттық құрамасының шабуылшысы Максим Самородовтың айналасындағы трансферлік қауесеттер қайтадан қыза түсті, деп хабарлайды Aladop.kz.
“Ахмат” сапында жарқырап жүрген отандық талантқа Ресейдің ең титулды топ клубтары көз тіге бастаған сыңайлы. Мәскеулік “Спартак” клубының бұрынғы бас бапкері Дмитрий Гунько Sports24.kz порталына берген сұхбатында Қазақстандық форвардтың РПЛ алпауыттарының қатарына қосылу мүмкіндігін ашық бағалады.
Дмитрий Гуньконың пайымдауынша, Максим Самородов Грозный қаласының ұжымына ауысқалы бері өз деңгейін мүлдем басқа биіктікке көтерді. Ол тіпті клубтың көпжылдық көшбасшысының орнын жоқтатпаған.
Бапкер Самородовтың бұл көрсеткіші оның мансабындағы шегі емес екеніне және оның болашақта бұдан да қуатты командалардан шақырту алатынына сенімді.
Дегенмен, Ресейлік маман Максимнің дәл қазір Мәскеудің “Спартак” секілді алпауыт ұжымына ауысуына қатысты өз қаупін де жасырмады. Оның айтуынша, Самородовқа әлі де аздап іздену керек:
“Самородов, менің көзқарасымша, алға қарай үлкен қадам жасады. Ол өте жарқын футболшыға айналды. Меніңше, ол әлі де дами түседі және Ресейдің ең атақты клубтарының назарына ілігеді. Бірақ дәл қазір "Спартак” секілді командаға ауысу үшін Максимге тағы да сәл қосу керек. Қазіргі уақытта оған ондай топ клубтың негізгі құрамындағы бәсекелестікке төтеп беру өте қиын болады. Алайда болашақта бәрі де мүмкін.” — деді Гунько.
Осылайша, ресейлік футбол мамандары Қазақстан құрамасының шабуылшысын РПЛ-дегі ең перспективалы ойыншылардың бірі деп есептейді. “Ахматта” өзін дәлелдеп үлгерген Самородов үшін алдағы уақытта грандтардың қатарына қосылу тек уақыт еншісіндегі шаруа сияқты.
