Алматылық «Қайраттың» бас бапкері Рафаэль Уразбахтин Қазақстан Премьер лигасының 29-туры аясында «Ақтөбеге» қарсы өткен матчқа баға берді. Алматы командасы сырт алаңда 2:2 есебімен тең түсіп, жеңіске жете алмады, деп хабарлайды Aladop.kz.
Бапкердің айтуынша, тығыз ойын кестесі футболшылардың физикалық жағдайына әсер еткен.
Уразбахтиннің сөзінше, «Қайрат» Ақтөбеде жеңіске жетуді көздеген және ойын барысына қарағанда, үш ұпайға жақынырақ болған. Алайда екі күн бұрын өткен Конференциялар лигасындағы «Панатинаикосқа» қарсы кездесу ойыншылардан көп күш талап еткен. Соның салдарынан футболшыларға физикалық тұрғыдан да, алаңдағы шешімдерді жылдам қабылдау жағынан да сергектік жетіспеген.
Бас бапкер Еркін Тапаловтың бірінші таймда ауыстырылуына да түсініктеме берді. Оның айтуынша, футболшы соңғы кездесулерде 90 минуттан толық ойнап, жеткілікті деңгейде қалпына келіп үлгермеген. Сонымен қатар «Ақтөбенің» жылдам ойыншысы Оджо «Қайраттың» оң қапталындағы қорғанысқа тұрақты түрде қысым жасаған. Сондықтан бапкерлер штабы бірінші таймның өзінде өзгеріс енгізуге шешім қабылдаған.
Уразбахтин командасының тағы да жылдам гол өткізіп алғанына өкініш білдірді. Ол мұны ойыншылардың зейінін жоғалтуымен және кездесулер арасындағы қалпына келу уақытының аздығымен байланыстырды. Соған қарамастан, бапкер футболшыларға алғыс айтып, соңына дейін күрескенін атап өтті. Матч барысында «Қайрат» екі рет есепте қалып қойып, таразы басын теңестіруге мәжбүр болған.
«Екінші таймда жеткілікті мүмкіндіктер жасадық, кем дегенде тағы бір гол соғуға тиіс едік. Бірақ Александр да бірнеше эпизодта командасын құтқарып қалды. Сондықтан бұл — тартысты тең ойын. Енді жағдайымызды қалпына келтіріп, алдағы кездесулерге дайындаламыз. Алда әлі ойындар, соның ішінде Еурокубок матчтары бар», — деді Уразбахтин.
