Алматы қаласында заманауи футбол стадионының құрылысы басталды. Жаңа спорт нысаны Құлжа және Талғар тас жолдарының қиылысында бой көтереді. Қала билігі стадион мен оның айналасындағы инфрақұрылым үшін 32,2 гектар жер бөлген, деп хабарлайды Aladop.kz.
Бастапқыда арена 35 000 көрерменге арналған деп жоспарланған болатын. Алайда, мамандармен кеңесе келе, орын санын 45 000-ға дейін арттыру туралы шешім қабылданды. Сәулетшілердің ойынша, стадион екі деңгейден тұрады. Орын санын бұдан әрі көбейту үшін үшінші деңгейді салу қажет болар еді, бірақ бұл жобаның айтарлықтай қымбаттауына және тірек конструкцияларына ауыр салмақ түсуіне әкеп соғады.
Бұл нысан тек футболға арналған, сондықтан мұнда жеңіл атлетика жолдары қарастырылмаған.
Алаң көлемі 105х68 метр. Стадионға заманауи гибридті көгал төселеді. Бұл — табиғи шөп пен тамыр аймағына 250 мм тереңдікке дейін тігілген синтетикалық талшықтың қосындысы. Мұндай алаңдар әлемдегі ең таңдаулы футбол ареналары мен жаттығу базаларының стандарты болып саналады.
Стадион ғимараты 4 қабаттан және жерасты тұрағынан тұрады. Арена ішінде тек футбол алаңы ғана емес, сонымен қатар медициналық кабинет, фуд-корт аймақтары және мұражай, офистік және техникалық бөлмелер, спорт түрлеріне арналған әмбебап залдар, жаттығу және фитнес залдары орналасады.
Жаңа стадион УЕФА-ның төртінші санатындағы стандарттар бойынша салынуда. Бұл Алматыға болашақта ең жоғары деңгейдегі матчтарды, сондай-ақ әлемдік жұлдыздардың қатысуымен өтетін шоу-бағдарламаларды қабылдауға мүмкіндік береді.
Қазіргі уақытта футбол аренасының ресми атауы әлі жоқ. Алматы әкімдігі бұл мәселеде Қазақстандық жанкүйерлердің ұсыныстарын қоса алғанда, кез келген нұсқаны қарастыруға дайын.
Жобаның бас мердігері — "ВД строй-инжиниринг” ЖШС, ал жобалаушы — "КазНИПИ” ЖШС. Алдын ала ақпарат бойынша, спорт нысаны 2028 жылдың наурызында пайдалануға беріледі деп жоспарлануда.
