Алматының «Қайрат» футбол клубының баспасөз қызметі жартылай қорғаушы Гиорги Зарианың командаға қайта қосылғанын хабарлады.
Клубтың Instagram парақшасында: «Кім қайта оралды деп ойлайсыңдар? Ол қайта келді!» — деген жазба жарияланды.
Кәсіпқой футбол лигасындағы (КПЛ) үзіліс кезінде алматылық клубтың көшбасшыларының бірі – Гиорги Зариа Грузия ұлттық құрамасына шақырту алған. Грузия құрамасы екі жолдастық матчын өткізді. 5 маусымда Фарер аралдарын 1:0 есебімен жеңді және 8 маусымда Кабо-Вердемен тең түсті (1:1).
Ал грузиялық футболшы бұған дейін алматылық команда сапында 24 мамыр күні “Оқжетпеске” қарсы ойында алаңға шыққан еді.
Айта кетейік, қазіргі уақытта «Қайрат» 33 ұпаймен Қазақстан Премьер-лигасының турнирлік кестесінде екінші орында тұр. Ертең алматылықтар чемпионаттың 15-туры аясында Түркістанның «Тұран» клубын өз алаңында қабылдайды.
Біздің серіктес: FONBET
