Грузиялық легионер Гиорги Зария Қазақстанға қайта оралуға өте жақын, деп хабарлайды Aladop.kz.
ASnews.kz сайтының мәліметіне сүйенсек, 28 жастағы жартылай қорғаушыны “Ақтөбе” клубы өз сапына қосуды көздеп отыр.
Тбилисиден Ақтөбеге: Трансфердің мән-жайы
Гиорги Зарияның Қазақстаннан кеткеніне көп уақыт бола қойған жоқ. Осы жылдың 6 наурызында ол “Қайратпен" жасасқан келісімшартын мерзімінен бұрын бұзып, еркін агент ретінде өз отанына аттанған болатын. Грузияда ол жергілікті алпауыт — Тбилисилік “Динамомен” келісімшартқа отырған еді.
Алайда, арада бірнеше ай өтпей жатып, Грузиялық жұлдыз Қазақстан чемпионатының деңгейі мен жанкүйерлерін сағынған сыңайлы. Қазіргі таңда “Ақтөбе” басшылығы футболшымен келіссөздерді соңғы сатыға жеткізген және трансфер ресми түрде жақын күндері жариялануы мүмкін.
“Қайраттағы” феноменалды статистика
Ақтөбелік ұжымның Зарияға бұлайша жабысуы тегін емес. Алматылық клуб сапында өткізген екі жыл ішінде ол өзінің жоғары деңгейлі шебер екенін толықтай дәлелдеді. Оның ҚПЛ-дегі көрсеткіштері кез келген бапкерді қызықтырары анық.
“Қайрат” жейдесінде жалпы 59 матч өткізген Зария, қарсыластар қақпасына 16 гол тоғытып, командаластарына 11 нәтижелі пас шығарып берген болатын.
Зарияның алаң ортасындағы әмбебаптығы мен шабуыл ұйымдастырудағы қасиеті "Ақтөбе” үшін таптырмас олжа болары анық.
