Грозныйлық “Ахмат” сапында жарқырап жүрген Қазақстандық шабуылшы Максим Самородов мансабындағы үлкен қадамға жақын. Жақын арада ол Ресей Премьер лигасының грандтарының біріне ауысуы әбден мүмкін, деп хабарлайды Aladop.kz.
Алматылық “Қайраттың” капитаны Александр Мартынович Sports24.kz тілшісіне берген сұхбатында жерлесіміздің өткен маусымдағы өнеріне жоғары баға беріп, оның болашағына қатысты өз ойымен бөлісті. Тәжірибелі қорғаушы Самородовтың деңгейі қазіргі клубынан асып түскенін айтты.
“Максим — өте мықты ойыншы. “Ахмат” ол үшін үлкен трамплин болды. Ол өзінің тамаша ойыны арқылы деңгейі әлдеқайда жоғары ұжымдардың назарын аударып үлгерді деп толық сеніммен айта аламын. Бұдан әрі не боларын уақыт көрсетеді. Оның Ресей чемпионатында легионер саналмайтыны — өте үлкен артықшылық. Келесі маусымда Самородов өз бағын одан да мықты командада сынап көруі әбден мүмкін.” — деді Александр Мартынович.
РПЛ-дың ресми ережесі бойынша, Қазақстан азаматтары Ресейде легионер (шетелдік ойыншы) болып саналмайды.
Айта кетсек, Максимге “Краснодар” клубы қызығушылық танытып отыр.
