Мәскеудің «Спартак» клубының спорт директоры Фрэнсис Кахигао Қазақстан құрамасының шабуылшысы Максим Самородовқа қатысты тараған ақпаратқа пікір білдірді, деп хабарлайды Aladop.kz.
Бұған дейін «Спартак» клубы Грозныйдың «Ахматында» ойнайтын Қазақстан құрамасының шабуылшысын өз қатарына қосқысы келетіні туралы ақпарат тараған болатын. Алайда Мәскеулік клубтың спорт директоры бұл тақырыпқа қатысты нақты жоспарды растаған жоқ.
«Самородов, бәрімізге белгілі, «Ахматтың» ойыншысы. Тағы да қайталаймын, ол — басқа клубтың футболшысы. Менің тарапымнан бұл туралы пікір білдіру құрметсіздік болар еді», — деді Кахигао «Чемпионатқа» берген пікірінде.
Осылайша «Спартак» өкілі Максим Самородовқа қызығушылық бар деген ақпаратты ресми түрде растаған жоқ. Кахигао футболшының қазіргі уақытта «Ахматпен» келісімшартта екенін алға тартып, ықтимал трансфер жөніндегі сұраққа нақты жауап беруден бас тартты.
Айта кетейік, Самородов жарақатына байланысты Қазақстан құрамасының Ұлттар лигасындағы алғашқы матчтарын өткізіп алған еді. Кейін ол ұлттық команда сапына қайта оралып, Фарер аралдарына қарсы Астанада өткен кездесуде алаңға шықты.
