Петропавлдың «Қызылжар» командасының бас бапкері Виталий Жуковский «Ордабасыға» қарсы ойыннан кейін Шымкенттегі стадионның алаң сапасын қатты сынға алды, деп хабарлайды Aladop.kz.
Кездесу Петропавлдықтардың 0:3 есебімен ірі жеңілісімен аяқталды. Бапкердің айтуынша, команданың ойынындағы көптеген қателіктер мен сәтсіздіктер тікелей Шымкенттегі орталық стадионның газонына байланысты болған.
Жуковский команданың жасанды алаңда жаттығып, ойнауға үйренгенін, сондықтан Шымкенттегі табиғи алаңға лайықты аяқ киімді дұрыс таңдай алмағандарын* айтты. Бұл футболшылардың алаңда жиі тайғанап, допты бақылауда қиындықтарға тап болуына әкелген.
Нашар газонның кесірінен доптың секіруі күтпегендей болып, ойыншылар арасында техникалық қателіктер көбейген. Бапкердің пікірінше, басқа жақсырақ алаңда команда мұндай көп қателік жібермес еді.
Есеп 0:1 болып тұрғанда «Қызылжарда» жақсы мүмкіндік болған. Егер сол сәтте гол соғылып, есеп теңескенде, ойын ағымы мүлдем басқаша болар еді.
Жуковский жеңілістің лайықты болғанын мойындағанымен, сәтсіздікке алаңның мүшкіл күйі мен сәттіліктің жетіспеуі себеп болғанын атап өтті.
